Aizawl June 15th, 2024 (Sat): Vawiin YMA Day pualin branch hrang hrangah faina hnatlang koh a ni a. Republic Veng Local Council leh Branch YMA chuan YMA Day pualin faina hnatlangpui an buatsaih a, Save the Riparians nen thawk hoin mi 1000 vel an thawk chhuak.

Hnatlangpui khuhhawnna hi Aizawl Municipal Corporation (AMC) Mayor Lalrinenga Sailo chuan neiin, "Aizawl khawpui tifai turin kan la tlai lo. Republic Veng a harh chhuak hmasaa in ṭang hi a lawmawm. Mizote hi septic tank thli paih dan leh bawlhhlawh paih danah hma kan sawn a ṭul hle" tiin hnatlang tura kalkhawmte chu midang tana entawntlak a insiam turin a chah a ni.

Republic Veng LC leh YMA ten hnatlangpui neih hma hian chhiatrupna laka in ven nan, vengchhungah tui chhe paihna dinhmun zirchianna neih a ni a. Tui chhe paihna nei ṭha lo in te chu siam ṭha tura tih an nih bakah vantlang rama tui chhe paihna ṭha tawk lo siam ṭhat dan tura hmalak chhoh a ni bawk. LC Chairman Lalengmawii leh Branch YMA President Pu L. Ramdinliana Renthlei te chuan thunam sawi bawk.

YMA record danin Republic Vengah hian chhungkua 965 an cheng a, mi 4210 an cheng. Republic Veng huam chhungah lui kawr pasarih awmin, hnatlangpuiah hian luikawr tih fai hna hi thawh a ni.

Save the Riparians hian tui hnaiah luikawr leh lui kam tihfaina kawngah hma an nasa hle. Frontline Leader Romalsawma chuan, "A hmun hrehawm lai, kal hrehawm lai pawh ni se, Save the Riparians-in hma kan hruai zel ang," tiin a sawi a, Republic Veng nena thawhhona hun ṭha a awm chu lawmawm a tih thu a sawi bawk.

Save the Riparians hian Aizawl khawpui chhung tihfai hna an thawk mek. Phase 1-ah Model Veng leh Mission Vengthlang inkar lui an tifai a, March 26, 2024 khan thawk ṭanin ni 20 chhung hun an hmang.

May 1, 2024 khan Phase 2 an ṭan leh a, Khatla aṭangin  an ṭan a, Ebenezer Hospital an thleng tawh a ni.